मिडटाउन सिनेमा नौ महिनापछि सञ्चालन

पोखरा, १४ पुस ।

पोखराको मिडटाउन सिनेमा खुलेको छ । मंगलबार चलचित्र पत्रकार संघ कास्कीले आयोजना गरेको पत्रकार सम्मेलनमा मिडटाउन खुलेको जानकारी गराइएको हो ।

कोरोना भाइरसका कारण विगत नौ महिनादेखि बन्द रहेको मिडटाउन सरकारको सामाजिक सुरक्षाका मापदण्डलाई अवलम्बन गर्दै खोलिएको मिडटाउनका प्रबन्ध निर्देशक निकेश द्वाले जानकारी गराए ।

हाललाई मिडटाउनमा पुरानै चलचित्रलाई प्रदर्शन गरिने उनले बताए । अहिले मिडटाउनमा चलचित्र आमा, सेन्टिभाइरस र अंग्रेजी चलचित्र इन्भिजिबल मेन प्रदर्शन गरिएको छ । दिउँसो १ बजे, अपरान्ह ३ः४५ बजे र साँझ ६ बजे फिल्म प्रदर्शन गर्ने गरी हल संचालनमा आएको द्वाले जानकारी गराए ।

सरकारले पीडा नसुनेको र बाध्य भएर आफूहरुले हल संचालनमा ल्याएको द्वाको भनाई छ । उनले भने, ‘बैंकबाट ऋण लिएर हल संचालन गरियो । आज पनि फोन आइरहेको छ । सरकारले हल संचालकहरुको हकमा केही सोच्दैन । अब बैंकको किस्ता ब्याज कसरी बुझाउने ?’

उनले मनोरञ्जनको क्षेत्रमा भएका लगानीको सुरक्षामा सरकार मुकदर्शक बनेको गुनासो पोखेका छन् । सरकारले फिल्म हल बन्द गर्ने आधार स्पष्ट नपारेपछि उनले आफूहरुले अनुमति बेगर नै हल संचालन गर्न बाध्य भएको जनाए ।

द्वाले रेष्टुरेण्ट, दोहोरी साँझ, क्लवहरु खुल्दा हल संचालन हुन नपाउनु दुर्भाग्य भएको बताएका छन् । मिडटाउन संचालन नहुँदा ४५ जना कामदारको रोजीरोटीमा असर पुगेको द्वाको भनाई छ ।

उनले मिडटाउन सिनेमाकै कारण वरिपरिका चिया पसल पनि चलेको र उनीहरुको समेत आम्दानीमा प्रभाव परिरहेको जानकारी गराए ।

अहिले मिडटाउनमा भौतिक दुरी कायम राख्दै एउटा सिट खाली राखेर ग्यापमा हल संचालन गरिएको छ । कर्मचारी र ग्राहकलाई पूर्ण सुरक्षाको वातावरणमा प्रत्याभूत हुने गरी काममा खटाइएको उनले बताए । रकम तिर्दा समेत अनलाइनका माध्यम व्यवस्थापन गरिएको र पैसा लिदादिँदा समेत सेनिटाइजरको व्यवस्थापन गरिएको द्वाले बताए ।

हल संचालन गरेको तीन महिना नाफा कमाउने भन्दा पनि फिल्म चलाउने वातावरण बनाउने उनले बताए । ५० प्रतिशत अकुपेन्सीमा आफूहरुले हल संचालन गरेको उनको भनाई थियो ।

द्वाले नयाँ फिल्म रिलिज हुन केही समय लाग्ने भन्दै महामारीका कारण पर्ख र हेरको अवस्थामा पुगेको बताए । अहिले निर्माता निर्देशक नै फिल्म रिलिज गर्न डराइरहेको उनको भनाई छ । हल संचालकले समेत सोचविचार गरेर फिल्म रिलिज गर्नुपर्ने अवस्थामा आफूहरु पुगेको द्वाले बताए ।

महामारीले सिनेक्षेत्रमा पुर्याएको असरको सामाना सबैले मिलेर गर्नुपर्ने उनको तर्क छ । द्वाले भने, अब आत्तिएर केही हुनेवाला छैन । सरकारसँग अपेक्षा गर्ने बाटो पनि हरायो । अब हामी सबै मिलेर लगानी जोगाउनुपर्ने बेला आएको छ । डरलाई जित्दै विस्तारै लयमा फर्किनुपर्छ ।

Related Articles

Leave a Reply

Your email address will not be published. Required fields are marked *

Back to top button
Close