फिचर

फागुन १४, २०७७ शुक्रबार

पोखरा । म्याग्दीको मालिका गाउँपालिका-३ पात्लेबाट बिरामी लिएर पोखरा आउँदै गरेको जीप दुर्घटनामा परेको छ । म्याग्दीको बेनी नगरपालिका-४, फापरखेतमा भएको जिप दुर्घटनामा एक जनाको मृत्यु भएको छ भने चारजना घाइते भएका छन् । ग१ज ६७८८ नम्बरको जिप गएराति सडकबाट म्याग्दी नदीमा खसेर दुर्घटना भएको बताइएको छ । 

दुर्घटनामा मालिका-३ का ६२ वर्षीय गोविन्द रोकाको बेनी अस्पतालमा उपचारका क्रममा मृत्यु भएको जिल्ला प्रहरी कार्यालय म्याग्दीका प्रहरी नायव उपरीक्षक श्यामकुमार राईले जानकारी दिए ।

रुखबाट लडेर घाइते भएका रोकालाई उपचारका लागि पोखरा ल्याउँदै गर्दा जिप दुर्घटना भएको हो । दुर्घटनामा जिप चालक मालिका-१ निस्कोटका ३० वर्षीय नरबहादुर रोका, मालिका-३ पात्लेका २९ वर्षीय रवीन्द्र रोका, २० वर्षीया रेजिना रोका र ३८ वर्षीय खगेन्द्र रोका घाइते भएका छन् ।

घाइतेहरुमध्ये जिप चालक नरबहादुरलाई थप उपचारका लागि पोखरा ल्याइएको प्रहरीले जनाएको छ । अन्य घाइतेहरुको म्यादी सदरमुकाम बेनी अस्पतालमा उपचार भइरहेको छ । चालकबाहेक मृतक र घाइते एकै परिवारका सदस्यहरु हुन् ।

तातोपानी प्रहरी चौकी, तातोपानी र पखेरका स्थानीय बासिन्दाले घाइतेको उद्धार गरेका थिए । दुर्घटनाबारे अनुसन्धान जारी रहेको प्रहरी नायब उपरीक्षक राईले बताए ।