समाचार

बैशाख २, २०७८ बिहिबार

पोखरा । स्वास्थ्य तथा जनसंख्या मन्त्रालयले ‘बढ्दो कोभिड-१९ संक्रमण’ बारे बिहीबार एउटा ‘अत्यन्त जरुरी’ अपिल जारी गरेको छ । अपिलको दोस्रो बुँदामा कास्की, काठमाडौँ, ललितपुर, रुपन्देही, चितवन, बाँके, पर्सा, भक्तपुर, कैलाली, मोरङ, दाङ, सुर्खेत, बारा र बाग्लुङ जिल्लालाई ‘अति प्रभावित’ भनेर वर्गीकरण गरेको जानकारी गराइएको छ ।

यी जिल्लाहरूमा ‘बढी भिडभाड हुने सबै क्षेत्र तथा सेवाहरू अविलम्ब बन्द गर्नुपर्ने अवस्था भए पनि विद्यालय, रात्रि व्यवसायहरू, सात बजेपछि सबै रेस्टुरेन्ट तथा क्लबहरू, खेलकूद, जीम, सार्वजनिक पूजाआजा तथा जात्राहरू, सभा, सम्मेलन, बैठक तथा भेलाहरू, सिनेमा हल, सपिङ मल, नाचघर, पार्टी प्यालेस, हेल्थ क्लब, स्विमिङ पुल आदि स्थलहरूमा सहभागी नभइदिनु हुन’ अपिल गरिएको छ ।

यस बुँदामा भिडभाड हुुने क्षेत्रमा रात्रि व्यवसाय, जात्राहरू, सभासम्मेलन, सिनेमा हल, सपिङ मल, पार्टी प्यालेस लगायतसँगै विद्यालयलाई पनि राखेर ‘सहभागी नभइदिनु हुन’ अपिल गरिएको छ ।

विद्यालयमा सहभागी नहुनु भनेको के हो ?

अपिल अनुसार विद्यार्थी र शिक्षकलाई विद्यालय नजानू भन्छ । निश्चय नै, भिडभाड हुने क्षेत्रमा विद्यालय पनि एक हो तर भिडभाड हुने सेवाका अन्य क्षेत्र र विद्यालय एकै होइनन् भन्ने कुरा स्वास्थ्य तथा जनसंख्या मन्त्रालयले बुझेको देखिएन । रेस्टुरेन्ट र सिनेमा हल नजानु र विद्यालय नजानु एकै प्रकृतिको कुरा होइन ।

अपिल मानेर शिक्षक र विद्यार्थी विद्यालय नजाने हो ?

विद्यालय बन्द भएको सूचना आएपछि मात्रै शिक्षक र विद्यार्थी विद्यालय नजाने हो भन्ने सामान्य कुरा पनि स्वास्थ्य तथा जनसंख्या मन्त्रालयले बेवास्ता गरेर शिक्षक र विद्यार्थीलाई ‘विद्यालयमा सहभागी नभइदिनु हुन’ अपिल गरेको छ ।

 अनौठो अपिल !

शिक्षा मन्त्रालका अनुसार कोभिडको अवस्था हेरेर विद्यालय चलाउने वा बन्द गर्ने अधिकार स्थानीय तहलाई छ । यसैअनुसार नेपालगञ्ज उपमहानरपालिकाले बिहीबारै एक विज्ञप्ति जारी गरेर आफ्नो क्षेत्रका विद्याल आगामी आइतबारदेखि एक साताका लागि बन्द गर्न निर्देशन दिएको छ ।

यस्तो छ अपिल