पोखरा-४ मा बजार अनुगमन : शुरुमा सचेत, अटेर गरे कार्वाही

असोज १३, २०७९ बिहीबार

पोखरा । पोखरा महानगरपालिका वडा नं.४ ले बजार अनुगमनलाई तीव्र बनाएको छ । वडा कार्यालयले वडा भित्रको गणेशटोल, रामकृष्ण टोल, सिद्धार्थचोक, चिप्लेढुंगा, महेन्द्रपुल, गैह्रापाटन क्षेत्रमा बजार अनुगमन गरेको हो । 

वडाध्यक्ष देवकृष्ण पराजुलीको नेतृत्वमा गरिएको औषधि पसल, फ्रेस हाउस, खाद्यान्न पसल, होटल तथा रेष्टुरेन्टको अनुगमन गरिएको हो । चाडपर्वको अवसरमा कोही पनि नागरिक नठगिउन्, गुणस्तरीय सामग्री पाउनबाट बञ्चित नहुन् भन्ने लक्ष्यसहित बजार अनुगमन गरिएको उनले बताए । 

वडाध्यक्ष पराजुलीका अनुसार केही पसलबाट अखाद्य सामान बरामद गरेर व्यापारीलाई सचेत मात्रै गराएर छाडिएको छ । केही समयपछि पुनः अनुगमन गरिने र त्यसक्रममा पनि व्यापारीले अटेर गरेको पाइए कडा कार्वाही गर्ने वडाध्यक्ष पराजुलीको चेतावनी छ । 

अनुगमनकै क्रममा केही पसल दर्ता नभएको र केही पसल नवीकरण नभएको पाइएको भन्दै त्यस्ता पसल सञ्चालकलाई चिठी काटेर वडामा आउन निर्देशन दिइएको उनले बताए । 

वडाध्यक्ष पराजुलीको संयोजकत्वमा वडा सदस्यहरु विष्णुमाया परियार, वडासचिव सुरेन्द्र प्रसाद शर्मा, पूर्व सदस्य सुवर्ण केसी, प्रविण पालिखे, शहरी स्वास्थ्य केन्द्रका प्रमुख सुजन पौडेलसहित जिल्ला प्रहरी कार्यालयका प्रतिनिधिको टोलीले बजार अनुगमन गरेको हो ।